ᎩᎶ ᏯᏆᏛᏛᎾ ᎭᏢ ᏕᏣᎸᏫᏍᏓᏁᎰ Ꮭ ᎢᎸᎯᏳ ᎢᏳᏍᏗ ᏯᏆᏅᏔ ᏯᎩᏪᏍᏗ. ᏝᎮᏅ ᎠᎯᏓ ᏱᎩ ᎠᏉᎮᎵᏴᏍᏗ. ᎭᏢ ᏓᎩᎸᏫᏍᏓᏁᎰ. ᎭᏗ ᏯᏆᏅᏔ… ᎦᏍᎩᎸ ᎠᏆᎵᏍᏓᏴᏗ ᏓᎩᎸᏫᏍᏓᏁᎰ, ᏗᎪᏪᎵ ᏧᏂᏙᎵᏍᏙᏗ ᏓᎩᎸᏫᏍᏓᏁᎰ, ᏱᏂᎦᎵᏍᏗᎭᏊ ᎢᎸᏢ ᏓᎩᎸᏫᏍᏓᏁᎰ. ᎯᎠᏅ ᏓᏤᏝ ᏗᏓᏛᏛᎲᏍᎩ ᏱᎩ- ᎦᎪ ᎡᏣᎾᏝᎠ. ᎦᏙ ᎭᏛᏁᎰ ᏕᏣᎸᏫᏍᏓᎾᎲ.

ᏃᏭᏅ ᎪᎯ ᎠᎴᏂᏍᎩ ᎩᎶ ᏩᏆᏛᏛᎾ ᎤᎿ ᏓᎩᎸᏫᏍᏓᏁᎲ ᎯᎠᏅ ᏓᎦᏬᎵᏴᏏ- ᎣᎩᎾᎵ ᎤᎾᏙᏢᏒ Z Puppets Rosenschnoz ᏧᏙᎢᏓ ᎥᎩᎾᏝᎠ. ᏗᏓᏴᎳᏛᏍᎩ ᏓᎾᏛᏁᎵᏍᎬ ᏕᏥᏃᎮᏍᎪ ᎠᎴ ᏓᏓᏜᏅᏓᏕᎲ ᎤᎾᏛᏁᏟᏗ ᏓᎩᏲᎰ. “Community Engagement” ᎠᏃᏎᎰ. ᎠᎴᏍᏊ ᏣᎳᎩ ᏗᎾᏕᎶᏆᏍᎩ ᎦᏥᏍᏕᎵᏍᎩ. ᏙᏃ ᎣᏍᏓ ᎠᎩᏰᎸᎰᎢ.

ᎭᏩ ᎥᏍᏊ ᏱᎦ ᎠᏆᏅᏔ ᎪᎯ. ᏔᎵᏁᏗᎾ.