yInDaj buSlI' toghar la'. qan. monchoH. <qanqu', teHba'> jatlh, pe'vIlHa' ja''eghtaHvIS. weQ Qav chu', 'ej qul naQHom SuS. qorDu'Daj juHDaq QamtaH, 'ej latHom vanlI'. tlhoy'Daq HuS Hom baS je yughbogh no' DIr'e', 'ej buS. pur. rech. chon bom ngo' bomchoH.

SuS vIQoy'a'? pagh 'IwwIj 'oH'a'?

chal chuch Doqvo' 'al SeS.

no' HuDDaq 'o'lav lumoq'a' chom?

pagh joq'a' tIqwIj yoH?

Qoghogh, 'ej bomchoH toghar. yoH'a' tIqDaj? DaH, ngoDvam luwoqqangbe' Hoch. nuch ghaH 'e' lumaq. ghaHvaD <bIvonlu'pu'> lujatlh.

SaQ toghar. raSDaq HewHommey puS lutu'lu' 'ej pay' qaw'moH. bong HochHom weQ chu'Ha'. tlhoS HurghchoH pa'. wa' weQ wovDaq ghanHa'choH. no' DIr buSqa'. tor. raSHomDaq tIq Degh 'angbogh vaH Hoy tu'lu', 'ej 'aplo'vam 'IHbogh tajtIq ngo' lel. 'etlh paQ 'ej ret'aq Hot.

<Heghbat lopDI' tennuSlI', tajvetlh lo'ta'. vaj tuqvaD batlh tatlhta'.> jatlh QIbDaq So''eghbogh vay'. ghugh ghov toghar, vaj tlhe''eghbe'. pagh jatlh la'.

<bIQaplaH'a', tennuS DarurlI', tajvetlh lo'taHvIS?> jatlh ghot.

jang toghar. <HInuQQo', nIyma'! batlh jIHegh 'e' vIHech. jIHoH'eghqangba', 'ach chobejlI'taHvIS, qayonmoHqangbe'bej. HImobmoH!> jatlh.

jang nuv. <bIHegh vIneHbe'! qatoD vIneHmo' naDev jIpaw. tajvetlh yIjotlhHa'. SoHvaD De' potlhqu' vIqem. De'vam DaSov DaneH'a', loDnalwI'?>

QIt tlhe''egh toghar. mInDu' boch neH leghlaH. <paghlogh be'nalwI' SoH! qa' mIgh SoHbej!> QIbDaq tajtIq jaD, 'ach DoSDaj qIpbe. ngab So''eghmoHwI. tlhoy' neH mup taj.

jach toghar. narghpu' nuv.

pay' wab tam Qoy'. QumwI' janHom lI''lu'lI'. jan tlhap 'ej chu'.

<la'> jatlh mangHey. <pegh jabbI'IDvam. 'eQ De' potlhqu' Hev 'obe'maj tutlh. DaH vay' DaghomnIS 'e' lura' DevwI'pu'. SIr'en 'oH pongDaj'e'. vulqangan ghaH. wejHa' veng wa'DIch SuchtaH. vulqanganvam yIghom, ghIq HIl'aD DaHev. SIr'en DaQannIS! HoHbe'nISqu'! ghaHvo' yo' bopbogh De''e' wIghojlaH. vabDot DaghojlaH SoH!>

janglaHpa' toghar, jabbI'ID van jatlhwI'.

pa' nuD toghar. Hewmey, weQmey, DIghmey je buS. tlhoy'Daq yIt 'ej tajtIq tlhapqa'. DaH HoH'egh 'e' wIv'a'? pagh vulqangan QanmeH mIw pab'a'? nuch ghaHbe'. Heghrupbej. 'ach ghaHmo' yo' Qaw'lu'be' 'e' Sovchu'. bachHa'be'. ghaH pumlu'pu' 'ach mujbe'pu'. chun! DaHjaj ram tuqDajvaD batlh chIwqa' 'e' wIv, 'ach batlh choqmeH HoH'eghrupbe'. Hub'eghmeH Suvqang. nom juH mej, tajtIq Hoy qemtaHvIS.