'ay' wa'DIch
tach wa'DIch 'el SIr'en. nuvpu' law' tu'. De'wI'HomwIj bej SIr'en, 'ej la' mIllogh buS. qan toghar, 'ej chISbogh rol tIq ghaj. potlhlaw'. 'ach leghlaHbe' vulqangan. ghaytan tachvamDaq ghaHtaHbe'.
<nuqneH, Hom?!> jachlu'. tlhe'egh vulqangan, 'ej tlhIngan loD Qup Sam. Sumqu', 'ej tlhuHDajDaq HIq larghlaH SIr'en. 'Iw HIq ngaSta'bogh bal 'uchtaH loDvam.
pe'vIlHa' jang SIr'en. <toghar la' vInejlI'. jIHvaD QuvDaj DanoblaH'a'?> jatlh SIr'en.
jang loD, <QuvDaj? Hu'tegh, Qo'noSDaq ghaHtaHchugh, HIjatlh! vIHoH vIneH! 'ej Qo'noSDaq ghaHtaHbe', Duj HInob, vaj vIHoHrup! ghaHmo', yo'wIj Qaw'lu'! batlh ghajbe'bej, toDSaHvetlh!> jatlh.
Huy'Daj pep SIr'en. yajbe'. qen, lul'a' tlhIngan Hubbeq? ghoblI'chugh tlhIngan wo', Sovbe'bej SIr'en. roj leHtaH yejquv 'e' Qub.
Qub SIr'en. <chaq Harghvammo' Qo'noSDaq mungeHpu' vulqangan yejHaD. chaq vay' luSov... 'ach qatlh De' potlh mujatlhpu'be'?> jatlh'egh.
SIr'en buSlI'ghach qagh loD chech. <va! nuq Data'lI'?! bolwI'vetlh yISam! jIHvaD yIqem, vIHoHmeH!> tlhutlhqa', ghIq balDaj woDqu'. tlhoyDaq ghormoH.
yev SIr'en. loDvaD ghel, jatlh, <yo'Daj Qaw'lu'chugh, chay' bItaH? qatlh Suto'vo'qorDaq latlh negh Datlha'be?>
pay' QeHqu'choH loD. DoqchoH mInDu'Daj 'ej QamchoH pobDaj, SIprat rur. jatlh, <petaQ! SoH qaHoHqangbej!> tajDaj QemrupchoH, 'ej ghughughchoH.
nom mev SIr'en. toghar la' SamnISba' 'ach DaH nuqDaq ghoSlaH? ghaytan latlh tachmey 'elnIS?
<wa'leS HIq pIw vIHe'bej> Qub, 'ach ruch'eghmoH.
latlh tachmey Suchta' SIr'en, 'ach toghar la' Sambe'. 'ach nuvpu' law' qIH. ghaHvaD wa' lut neH ja' Hoch.
qen, neHmaH HubtaHvIS, yo' naQ Qaw'moH vay', 'ach vay'vetlh ngu'laH pagh. jabbI'ID Hevbe' Huvbbeq DevwI'. toghar la' pIchlaw' HochHom tlhInganpu', 'ach pIchmeH meqchaj yajbe' SIr'en. neHmaH HubmeH yo' ra' toghar la', 'ach Duj tlhIn ra'be' 'ej yo' Qaw'lu'DI', yo' tlhejbe'. Qo'noSDaq ghaHpu', QI' Soj loHtaHvIS. 'a toghar la' muSchoHpu' HochHom.
tagha', tachmeyvo' mej SIr'en. 'ach mebpa'meyDaj ghoSbe'. web yajDaj. <chaq tuQDoq jImaS,> Qub. veng wa'DIch tawmeyDaq yIt, 'ej po Daq HopDaq paw.
