有可能因爲海風所到帶嚟濃烈鹽味嘅味道，阿奇此時受到刺激，個肚飢腸轆轆，結果就忍唔住宣佈已經去到開餐嘅時間啦！佢哋離開疊石後就行返主路，此後就轉返去到天后廟嘅方向，行咗唔到三五分鍾就返到頭先步行過嘅一塊大大哋嘅草坪。嗰度平常算爲宿營者嘅一個好選擇，不過當時雖有兩個帳篷搭好喺度，但係當刻見唔到半點人影，想必早就起步去「祭五臟廟」，攪到地方恰好空無一人。孚脆首先攤舒自己特登買到嘅一塊毛毯，係屬於加大碼嘅，舖喺地下大家坐落去都完全冇嗮迫狹感。七個人咁樣入座之後，好似係唔耐前去拜神時咁樣，人人都各自又背囊裏邊拎出啲「祭品」，包括住食物、飲品、筷子碗碟等，喺嗰塊織成花格圖案式毛毯上面逐一擺放落去，睇上嚟真係相當之豐富。俗話説，萬事開頭難，不過人哋食晏反而明明係個例外，當時見到眼前擠齊嘅種種美味佳餚，肇始就變得同開口一樣容易，比反掌更加簡單，正如英文所講，即係 as easy as pie . . .